Hier kom ik weg: 'Het ofwisseln en speulen met taol vind ik prachtig'

De rubriek Hier kom ik weg giet over Drenthe, heur inwoners en heur verhalen. Illustratie: Dagblad van het Noorden

De rubriek Hier kom ik weg is een samenwarking met het Huus van de Taol en giet over Drenthe, heur inwoners en heur verhalen. Jordi Jager oet Coevern prat vanof zien tienerjaoren Drèents en döt veur zien masterstudie Meertaoligheid underzuuk naor de commodificatie as verstevigingsstrategie veur het Drèents. Ja, precies. En dat is?

Hij möt der zölf ok um lachen. De dure woorden die bij wetenschappelijk underzuuk heurt, zul a zölf nooit keuzen hebben. ,,Commodificatie betiekent daj iets ziet as een marktobject. Iets wat in geld oet te drukken valt. Ik underzuuk of het creëren van meer marktweerde veur het Drèents de taol kan verstarken en daormet interessanter maken kan veur meer mèensen”, legt de student (28) oet.

Dat aal minder mèensen Drèents kunt, giet hum an het hart. Veur hum vuult de taol as ‘thuus’, ok al is e Nederlandstaolig opvoed. Maor op het vwo in Coevern kreeg e via klasgenoten en vrienden het Drèents met en zo leerd’e de taol toch.

Jager gebroekt nou beide taolen en wisselt die net zo makkelijk of met Engels en Duuts. ,,Ik heb Europese Taolen en Culturen studeerd en doe non de master Meertaoligheid, maor mien hiele studie was in het Engels, op een paar Duutse vakken nao dan. Juust dat ofwisseln en speulen met taol, vind ik prachtig.”

(Tekst gaat verder onder de foto)

FC Emmen en trots

Zien zwak veur het Drèents brengt hum op het idee zien masterscriptie over die taol te laoten gaon. Het underzuuk giet over de vraog of de marktweerde daorvan te verhogen is. FC Emmen is volgens Jager een goed veurbeeld van die zogenuumde commodificatie: ,,Die club döt der alles an um de Drèentse identiteit oet te stralen. De clubkleuren zit in de provinciale vlag en het kasteel van Coevern stiet op de tenues. De leus van de club is Hier kom ik weg en vlak veur de wedstrieden wordt keihard Lohues dreeid.”

Zo gef FC Emmen Drenthe en het Drèents meer weerde, is zien overtuging. ,,Het steg in het anzien van mèensen, waordeur ze lichtkaans meer de neiging hebt het zölf ok te gaon praoten. Dat hef met trots te maken. Die trots vuul ie ok in het stadion.”

Smaak te pakken

Deur literatuurunderzuuk te doen, hef Jager bekeken of bestaonde theorieën oet underzuken naor aandere talen op het Drèents toepast kunt worden. De eerste versie van zien scriptie hef e inleverd. Over oetkomsten wil e nog niks kwiet.

Maor het underzuken van de taol smak naor meer. ,,De vraog waorum der niet ien standaard vörm van het Drèents invoerd kan worden, vind ik hiel interessant. Wij hebt nou zeuven varianten. Wieder denk ik dat der kaansen bint um de taol een beter karakter te geven, waordeur meugelijke schaamte bij Drenten die as wal Drèents kunt, maor het niet doet, wegvalt.”

,,Tegeliek denk ik ok: Ik ben een student en heb nul autoriteit a’k het vergeliek met mèensen die hier al jaorenlang met gaangs bint. Maor toch zul ik geern willen bijdragen an het underzuuk. Argens muj een begun maken.”

Je kunt deze onderwerpen volgen
Drenthe
menu