Hier kom ik weg: 'Ik kan mien gevuul het beste oetdrukken in het Drèents'

Leon Moorman. Eigen foto

De rubriek Hier kom ik weg is een samenwarking met het Huus van de Taol en giet over Drenten en heur verhalen. Leon Moorman oet Barger-Compas zung op zien 18de zien eerste noten. Twaalf jaor later leeft e van de meziek. D-pop nuumt e het: Drèentstaolige popmeziek.

Op zien 18de wet e dat zien dreum um profvoetballer te worden niet oetkommen zal. Asof zien mam het anvuult, gef ze hum rond die tied op veur zangles. Een nei avontuur begunt veur Leon Moorman. ,,Ik was altied drok met voetbal, maor begunde aal vaker te zingen. Het was een soort umslagpunt.”

Dat e nou in het Drèents zingt, har Moorman (30) toen niet vermoeden kunnen, allewal der thuus op Barger-Compas Drèents praot weur en tegenwoordig nog altied. Ok thuus in Zwolle waor e met zien vriendin woont, döt e het miesttieds. ,,Ze komp van Dedemsvaort en kan het verstaon.”

Naor Huus

Hij hef de opleiding Jazz & Pop daon an het conservatorium in Zwolle. Behalve zang stun daor ok de theorie achter meziek centraal. ,,De eerste 18 jaor van mien leven har ik nooit wat met muziek daon, thuus was niemand daormet bezig, dus dit was veur mij een versnelde manier um alles te leren.”


Moorman komp in de Engelstaolige folkband Scrum, waor e veer jaor leadzanger is en waorveur e ok liedties schref. Ze treedt overal in Nederland op.

,,In 2018 heb ik met een kameraod oet Weiteveen besleuten um oes op te geven veur het Drèents Liedties Festival. In twie dagen schreven wij het nummer Naor Huus .” Ze wordt selecteerd veur de finale, maor Moorman döt zölf niet met. ,,Die dag hadden wij ok een fandag van Scrum en die kun ik niet missen.”

De wiede wereld in slingerd

Naor Huus wordt die aovend deur een gastzanger zungen. Maor Moorman brengt het daornao nog wal zölf oet. ,,Tot mien grote verbaozing weur e niet veul later drèeid op Radio 5.”

Zien neie ambities bliekt niet te combineren met Scrum en hij stopt. ,,Het vuulde of ik de wiede wereld in slingerd weur. Opiens kun ik alles zölf beslissen en zölf alle liedties schrieven. Ik kwam derachter dat schrieven in het Drèents mij veul beter lag. Mien Engelse teksten waren minder persoonlijk. Ik kan mien gevuul beter oetdrukken in mien eigen taol en dat is Drèents. Dit stiet het dichtst bij mij. Ik dèenk ok in het Drèents.”

‘Leven van de meziek’

In 2019 wint e met het nummer Knooin het Drèents Liedties Festival en de publiekspries bij het Suns Europe Festival in Italië. Veurig jaor zul Moormans eerste album oetkommen, maor corona kwam dertussen. ,,Ik stao te popeln um het oet te brengen, maor der moet nog wat dingen gebeuren.”

Wieder hef e in 2020 op muziekgebied nog van alles doen kund. ,,Maor sinds december ligt zowat alles stil. Eerst vun ik het wal goed um even bij te kommen, maor nou denk ik wal ies: hoe lang giet dit nog duren?”

,,Ik wil leven van de meziek, ok al is het nou even moeilijk. Der bint wal meer muzikanten die veur de lol een keer wat in het Drèents doet, maor ik wil dermet deurgaon. Daniël Lohues is een pionier op het gebied van Drèentstaolige meziek en hij is veur mij het bewies daj daor succesvol met wezen kunt in Nederland.”

Nieuws

Meest gelezen

menu