Hier kom ik weg: ‘Ik weet da’k tegen wat schienen anschupt heb, maor ik heb gien bienen breuken’

De rubriek Hier kom ik weg giet over Drenthe, heur inwoners en heur verhalen. Illustratie: Dagblad van het Noorden

De rubriek Hier kom ik weg is een samenwarking met het Huus van de Taol en giet over Drenthe, de inwoners en heur verhalen. Sander Vos is in Börk een bekend gezicht. As eigenaar van Zalencentrum Meursinge en veurzitter van voetbalclub VKW schuwt e niet zien kop boven het meeiveld oet te steken.

Een maond nao de heropening van de horeca hef e bij burgemeester Mieke Damsma op gesprek west. Over hoe het nou giet, maor ok over de harde woorden die der vallen bint. Under meer umdat e de gemiente Midden-Drenthe maor star vun met het verbod van muziek op zien pop-upterras, speciaal anlegd vanwege de coronamaatregeln.

Sander Vos (41) wet dat e mangs oet de pas löp, maor wet ok donders goed wat e döt. ,,Mien plan veur het 2250 veerkante meter grote terras he’k eerst via de media wereldkundig maakt en daornao pas bij de gemiente meld. Een hiel bewuste keuze, want aans ha’k het nooit veur mekaar kregen. De gemiente vindt het te groot, maor ja, dat is juust neudig um het antrekkelijk te maken.”

Het is hum lukt. Op 1 juni kun zien terras open. ,,Ik weet da’k tegen wat schienen anschupt heb, maor ik heb gien bienen breuken. En de blauwe plek die der zat, is alweer vort. Wij hebt een goed gesprek had en vaststeld da’w nog aal goed met mekaar deur ien deur kunt.”

Dreug achter de oren

Vief jaor is de in Mantinge opgruide Vos eigenaar van Zalencentrum Meursinge. Op zien 18e dreumd’e der al van. ,,Op een dag he’k met mien beste kammeraod bij de toemaolige eigenaar anbeld. ‘Wij wilt je bedrief kopen’, zeden wij. Hij hef oes oetlacht vanzölf en zee da’w maor weerumkommen mussen aw dreug achter de oren waren.”

 

Vos giet an het wark in de horeca in Börk as e in havo 4 van schoel stuurd wordt. ,,Ik was een dwars en recalcitrant mannegie en wus nooit wa’k wol, maor nao een half jaor warken, har ik in de gaten dat de horeca echt wat veur mij was. Toen bin ik hen de middelbare hotelschoel gaon.”

Hij komp vanneis met de veurige eigenaar van Meursinge an de praot as e een groothandel in koffie en thee hef. ,,Wij hebt herinneringen ophaald en toen verteld’e dat e de zaak wal verkopen wol.”

Verlies beparken

Nao vief jaor hard warken, komp in meert de dreun die corona het. ,,De dag waorop wij dicht mussen, zal ik nooit vergeten. Het was een bizarre tied. Alles waj opbouwd hebt, glipt je deur de vingers en je kunt der niks an doen.”

Hij löp veur tunnen an umzet mis. Zien tiedelijke terras en de versoepelingen van de coronamaatregeln maakt dat niet zomaar weer goed. ,,Wij bint nog aal gangs um het verlies te beparken. Ik weet niet wanneer het bedrief weer rendabel is. Mien grootste zörg is hoe het ‘t ankommend jaor gaon zal.”

Toch is e der de man niet naor um bij de pakken neer te zitten. Mede deur zien inspanningen is muziek op terrassen nou toch toestaon in de gemiente. ,,Ik bin een positief mèens en zolang alles deurdreeit, wij gezond bint en de zun schient – allebei veur niks – is het maor even zoas het is. Oeteindelijk komp het weer goed.”

Deze rubriek gaat even met zomervakantie.De reeks gaat na de zomer verder.

Nieuws

Meest gelezen

menu