Hoera! Streektaol op de landelijke tillevisie! Maor waorum nou juust een historicus as ‘deskundige’ an taofel en niet iene die nog aal actief gangs is met underzuuk naor de streektaolen? | opinie

Herman Pleij te gast bij OP1. Foto: YouTube

Als we onze streektalen nog altijd waardevol genoeg vinden, dan moeten we ook zorgen dat daarover de juiste specialisten in de talkshows zitten, stelt Renate Snoeijing. Volgens haar lopen ze in Hilversum op dit gebied een beetje achter.
Lees meer over
Opinie

Op dunderdag 3 juni was der in het tillevisieprogramma OP1 andacht veur de streektaol. Zo vaak gebeurt dat niet op landelijke zenders, dus vanzölf biw daor gloepends wies met!

An taofel zaten Emeritus hoogleraar historische Nederlandse letterkunde Herman Pleij, actrice Peggy Vrijens, kaomerlid Habtamu de Hoop en cabaretier Steven Brunswijk. Het gesprek gung over ‘het verbroederen en verbinden door de streektaal’.

Pleij legde nog ies goed oet dat streektaolen gien verbasteringen bint van het Nederlands en dat alles begund is met streektaolen en dat daornao pas het Nederlands construeerd is.

Maidenspeech in het Fries

Habtamu de Hoop is met zien 22 jaor de jongste politicus in de Tweide Kamer en hie hef zien gelofte en (een diel van) zien maidenspeech in het Fries daon, umdat de Friese taol belangriek veur hum is. Vrijens komp oorspronkelijk oet Maastricht en veur heur gef de streektaol ‘een ontzettend wij-gevoel’. Het is een underdiel van heur identiteit en het zit hiel diep. Daorum leert ze heur dochter ok Maastrichts, ondanks het feit dat ze zölf al jaoren in Amsterdam woont. Taofelgast Brunswijk woont nou 31 jaor in Brabant en zeg daorover: ‘Als je ergens heel lang woont, dan moet je toch echt je best doen om die taal niet te spreken.’

Mooi um ies van aandere streektaolsprekers op landelijke tillevisie te heuren hoe belangriek zie het vindt dat de streektaol bestaon blef en wat die taol met heur döt.

Toch vraog ik mij of waorum nou juust een hoogleraar historische letterkunde as ‘deskundige’ an taofel vraogd is. Met alle respect veur de kennis en verdiensten van Pleij, maor waorum hier nou niet kiezen veur iene die nog aal actief gangs is met underzuuk naor de streektaolen? Bijveurbeeld hoogleraar Marc van Oostendorp, een Nederlandse taolkundige die zuch undermeer bezigholdt met dialectologie. Of Leonie Cornips (Bijzonder hoogleraar Taalcultuur), Elma Blom (hoogleraar Taalontwikkeling en Meertaligheid in gezin en onderwijs), Jos Swanenberg (bijzonder hoogleraar Diversiteit in Taal en Cultuur in Brabant ) of Harrie Scholtmeijer (dialectoloog)?

Een dudelijker en moderner beeld

En wat te dèenken van Joana Duarte (lector meertaligheid en bijzonder hoogleraar wereldburgerschap) of Martijn Wieling (bijzonder hoogleraar Nedersaksische/Groningse Taal en cultuur). Allemaol mèensen die een bult underzuuk daon hebt en nog aal doet op het gebied van streektaolen en daor wat mij angiet een dudelijker en moderner beeld van neerzetten kunt dan dat nou gebeurd is. Zo heb ik over het belang en de veurdielen van meertaoligheid nou gienien heurt. En dat is toch een gemiste kaans!

Aw oeze streektaolen ok in het heden weerdevol genog vindt, dan moew ok zörgen daw daor de juuste specialisten veur an taofel kriegt. Wark an de winkel dus veur elkenien die zuch bezigholdt met streektaol, want in Hilversum loopt ze nog een beetie achter op dit gebied!

Renate Snoeijing is directeur van Huus van de Taol

Nieuws

menu